Friday, 14 February 2014

বংশীৰ বাঁহী


বংশীৰ বাঁহী

মৰনৈ পাৰত বংশীয়ে যদি বাই বাঁহী
জ্বলি উঠে টেঙেচি ফুলৰ চাকি
সাৰ পাই উঠিছে
জকাইচুকীয়া মাছ
চৰাইমৰা দলনিতো পিশাচীৰ নিস্ফূট মাত

কিমান মাতিম আই
নাহিলি দুনাই

চা-চোন
কেনেকৈ ফুলিছে সেয়া
ভেটনিত পাঁহি
বংশীৰ বাঁহী

শুনচোন শুন
তেঙাখাতীৰ ৰাউচি
বংশীক আহিছে খেদি
কিয়নো তেনেকৈ বজালি
কাল-সন্ধিয়াটো বিনালি

ক-চোন ক এবাৰ
তুহিলাবাৰীৰ সাধুটো
লেঠা হেনো মিকিৰবৰানীৰ গা-টো
বিহুখন কেতিয়া পাতিব
নখবোৰ কলা কৰি কোনোবা জিকিব
ধিনখিতা খিতদাও দুমদুম বাজিব
নাচিব নাচিব লোহিতমুখীয়া নাচনী নাচিব

গা-চোন গা লোহিতমুখৰ গানটি
কামদেৱাল এৰি গল সেই গাভৰু হাঁহি
এনেকৈ কেনেকৈ থাকিবি
মেলি দে মেলি দে তোৰ এহতীয়া ডিঙা
বাঁহী বাই ওৰে ৰাতি পাওগৈ পিছলা
শেহ নিশা খাৱৈত নামিম
জলকুঁৱৰীক মাতিম
পাতিম পাতিম তোৰ বিয়া পাতিম

ৰ-চোন ৰ
পিছলালৈ নাযাবি
পিছলিব মনটি
সুৰে সুৰে সুলকিছে মেঠনি
শৰীৰত তোৰ কিহৰ অগনি
ইমাননো কিহৰ ভোক
চিকাৰীঘৰৰ লতাৰে বান্ধি দিও মুখ

 সাগৰ সৌৰভ

2 comments:

  1. aah, mantu bhal lagi gol.......xanghatic dhuniya...boroxunor pisot matir gondho tu monot poril !! (Y)

    ReplyDelete
    Replies
    1. thnk u bro....apuniu likhibo buli asha thakil....

      Delete