নৰিমন পইণ্টৰ ৰাস্তাটোৰে খচকি যাওঁতে
সাগৰখনৰ সমূখতে
এজনী ধুনীয়া নাৰীক লগ পোৱাটোকে
মই আশা কৰোঁ
ধুনীয়াৰ সংজ্ঞা বিচাৰি
আজি আৰু বিতৰ্ক নকৰোঁ
মোৰ উশাহে তেওঁক খেদি ফুৰে
অনুসৰণ কৰে
তেওঁৰ প্ৰতিটো খোজ
কফি খোৱা কাগজত গ্লাছটো
পেলাই দিবলৈ ডাষ্টবিন এটা বিচাৰি ফুৰোতে
হাতখন পাতি দিবলৈ মন যায়
মচি দিবলৈ মন যায়
ওঁঠত লাগি থকা কফিৰ গোন্ধ
সন্ধিয়া এটা ৰৈ তেওঁলৈ
মই ৰৈ থাকো লিফ্টখনলৈ
টিপি দিবলৈ সপ্তম মহলাৰ চুইচ
একেলগে নামি দিবলৈ
কথা এষাৰিৰ ব্যৱধানত জুখি পেলাবলৈ
শৰীৰৰ সকলো উষ্ণতা
বহুদিন তেওঁক দেখা নাই
খবৰ এটা দিয়া ভাই
লিফ্টমেনটোৰ মাতটো কেনেকুৱা পাই
মানুহজনী ক'ত গ'ল
হেৰাই গ'ল
মানুহ হেৰাই
মানুহ হেৰাই
বহুত মানুহ হেৰাই গ'ল
চিনাকি নোহোৱা হ'ল
লিফ্টমেনটোৰ মাতটো কেনেকুৱা পাই
এদিন বোপা তুমিও হেৰাবা
কাৰোৰে একো খবৰ নাপাবা
No comments:
Post a Comment